حط حجرين عاشيشه ، وسيبك من موضوع الكورونا ، سيبها على الله ياباشا ، ولاعزاء للسكان !!
وقد بدى عليه الإرهاق والإحباط جلس جارى يحكى ويشكى ! .. بعد تعب العمر كله , بعد رحلة شقاء وقرف فى الخليج ، جمعت الغنيمة ! وأشتريت شقه تمليك . الحمد لله . منطقة راقيه وجيران مهذبين ، يعنى تعرف تربى العيلين وتعيش مستور من غير دوشه وصداع، لكن بين يوم وليله ، لاعدت قادر افتح باب ولاشباك ! ولاعارف آخد نفسى . والسبب أيه ؟ الباشا والشيشه ...
ياباشا لما تكون زهقان ولامؤاخذه طالع روحك ! ، إنزل روق نفسك عندنا ، ماتش ليفربول ومحمد صلاح ، ومعاهم أحلى حجرين على الشيشه ، يرجع مزاجك عنب وتروق الدماغ . جرب بس إنت وإنت هتدعيلى !
على فكره انا محسوبك محمد . على إسم الباشا صاحب الكافيه . الباشا إسمه على إسمى . !
إحنا عندنا تجهيزات تمام والله وبالنسبة للشيشه عندنا مباسم ديسبوزابل اممممم ديسبوزابل يعنى بتستخدمها مره واحد ومحدش بستخدم مبسم مكان التانى آه احنا برده بنعرف نحافظ على صحة الزباين بتعنا . اصل كلهم محترمين ذى حضرتك كده .
أنا عارف ان حضرتك خايف من الكورونا . ياباشا سيبها على الله . طيب لما نبطل شيشه نكسب منين ونعيش إذاى . الحكومة مضيقاها علينا بسبب الكورونا . لكن ماشاء الله الباشا بتاعنا بيصرف !
اممممم . تعرف حضرتك ان فى قرار لمجلس الوزراء بمنع الشيشه اليومين دول بسبب الكورونا . طيب نعيش إذاى ؟ تعرف تقوللى ؟
كباية الشاى والقهوه متكسبش . أنا مرتبى 2000 جنيه وخذ بالك إحنا ثلاثه بنشتغل هنا ! غير الميه والكهرباء وغيره !
طيب قوللى الباشا يسد كل ده منين ؟ والله الله يكون فى عونه .
مش ناقصه تقفيل من الحكومه كمان . ولارأيك أيه ياباشا . إنت مبتردش عليا ليه ؟
يمكن كلامى مش عاجبك ولاأيه ؟
تعرف ياباشا جت علينا كبسه من المحافظه من كام يوم . ولموا الشيشه كلها . مع ان الحال كان عال والعجله رجعت تدور .. المهم إنهم لمو الشيشه كلها والباشا كان واقف زعلان ..!!
تعرف لموها الساعه تسعه عشرة بالليل . الباشا مسكتش . تصدق إن كل الشيشه رجعت الساعه اتناشر يعنى نص الليل .. والله العظيم دا حصل ياباشا . يعنى بس عطلونا ساعتين تلاته . لكن الباشا بتاعنا واصل ماشاء الله فى ساعتين زمن كانت الشيشه راجعه تانى .
قلت إيه ياباشا . مش عايز تكركر شويه ؟ . أحطلك حجرين ؟!!
