فتيات تيك توك فى قفص الإتهام

نعم حكم على مودة الأدهم وحنين حسام وغيرهن  منذ عدة أسابيع بالسجن لمدة عامين بعد إدانتهن بانتهاك قيم الأسرة المصرية . حكم أول درجة ربما كان هناك إستئناف لاأدرى ؟

ولكن ماهى قيم الأسرة المصرية ؟ ومن هو القائم عليها . على نشرها وإخطار الأسرة المصرية بها وبمفرداتها ومن هو الساهر على تنفيذها ؟

بالقبض على مودة الأدهم وحنين حسام وأقرانهن وبالحكم عليهن . نعلم الطرفين المنوط بهما إيقاع العقوبة بمن ينتهك هذه القيم

ولكن هل هذا هو كل شىء ؟ القصة أبعد من ذلك وأعمق ولاأبالغ إن قلت وأخطر أيضاً

يتابع حساب مودة الأدهم الأصلى على يوتيوب وتيك توك مئات الالاف فضلا عن مئات الالاف من خلال الحسابات الطفيلية الغير أصلية واللى كل شغلتها تأخذ المادة الفضيحة والمثيرة وتنفخ فيها من أجل حفنة مشاهدات ودولارات !!

همسة فى ودنك ....ششش.. إحنا شعب يحب الفضيحة .. وعندنا ثراء نادر الوجود من كل حاجه وعكسها !

دا حقيقى شوفو تعليقات الناس بعد الحكم على مودة الأدهم وحنين حسام وأقرانهن والتى صدرت منذ أسابيع . نعرض بعضها لكى تعرف مايدور بين الناس عالنت . وكثيرا من هذه التعليقات لم نتمكن من كتابتها كونها تودينا فى خبر كان ! .

بعضاً من تعليقات الناس عالنت بعد الحكم

• في مصر مسموح الرقاصة ترقص .. مسموح الممثلة تمثل مشهد ساخن في فلم .. بسس ممنوع البنات يلبسوا قصير ويرقصوا في التوك توك !! ممكن حد يفهمني يا جدعان؟!
• ما فيش اي حاجه في الفيديوهات تستاهل القبض عليها و محاكمه و سجن !! البلد مليانه اكتر من كده بكتير اوي!!
• ازاي الفيديوهات مافيهاش اي حاجه ؟ انت مجنون رسمي زيها بقي ! دي نصها التحتاني كله باين انت ترضي لأختك كدا ؟ والله جايز تقول ارضي ربنا يخلصنا من اشكالكوا النجسه دي بقي خلوا البلد تضنف ويرجع لينا قيمنا واخلاقنا
• البلد كلها فقر وامية وبطالة ورشاوى وسرقات يطاردون فقط البنات
• شويت بنات مراهقات غاويين شهرة بس الفرق بينهم وبين غيرهم انهم مش معاهم تصريح...يعني اذا كانوا بيعملوا ده باسم الفن والرسالة كان يختلف طبعاً ويا سلام اذا كان فيه تصريح يعني مثلاً الفنانات يروحوا في مهرجان الجونة ويلبسوا من غير هدوم وياخدوا جوائز والدولة تكرم معاهم تصريح...الأفلام لا تخلوا من العري وتحت الرقابة معاهم تصريح... لكن دول مش معاهم تصريح.....ههه لا حول ولا قوة إلا بالله
• وتلك الافلام الساخنة التي كانت تعرض على التلفاز لم لم يسجن ممثلوها ومخرجوها؟ غريب فعلا
• طيب ما رانيا يوسف بتلبس لبس فاضح اكتر منها متسجنتش ليه حلو انكم تعاقبوا ناس بيلبسوا لبس فاضح بس مش عدل ان العدل مش مع كل الناس
• نحنو فى زمن العاهرات
• حرام عليهم والله طب يرحوا يشوفو الممثلين اللي بيعملوه ده مش عدل
• الله يخربيت صانع اليوتيوب فضح العالم الثالث وعارانا حسبي الله ونعم الوكيل
• يعني يا جدعان النجوم القدام لو لسا عايشين لازم ينقبض عليهم ماهي كل الافلام القديمه كدا
• الرقاصة في الاقراح تعمل ضمن القانون أما على اليك توك فتعتبر جريمة
• ما التيك توك كلة كدة فيديوهات ملهاش لازمة يبقى نمنعة فى مصر و خلاص

تعليقات الناس عالنت على بعض الفيديوهات لمودة وحنين قبل الحكم 

• شوفي المحتوي اللي انتي بتقدميه يخلي الناس تعاملك ازاي وتشوفك ازاي
• يا بنت خافي على نفسك من القتلة و المجرمين خاصة ان الكل يعرف انك عايشة لوحدك . لماذا تعيشين وحدك اليوم شتموك و غدا ربنا يستر
• تواضع ايه دى انت لو في الصعيد نهار ابوك اسود اقسم بالله دي اهلينا مش بتوافق علي الصور غير يوم الفرح والخطوبه بس وعجبي
• متقتحيش الباب لحد وبوصي من العين السحريه قبل ما تفتحي
• انا عايزه اسالك سؤال انتي هتقبلي ربنا ازاي طب تعرفي ان امك وابوكي يوم القيامه هيتعذبه وبسببك انتي ده غير طبعا العذاب وجع القلب اللي فيهم ?
• من الي بتقدمي يا حببتي مش قصه راجل موجود ولا لا دموعك دي مش هتاثر فينا ايه الي يخلي اولاد يجيوا يقولوا ألفاظ وحشه من الوحش الي بتقديمه وبتستفزي بيه الشباب واللبس العريان منتي ممكن تعملي تيك توك وانتي لابسه مش لازم قمصان النوم الي بتطلعي بيها عيب احنا قرفنا منك ومن غيرك منكم لله لعملمك انتي لو بتقدمي حاجه محترمه او بتلبسي محترم مكنش الاولاد عملوا كده بزمتك يقدروا يعملوا كده مع واحده محجبه يتكسفوا طبعا لكن انتي الي لازم تتكسفي هيا الشهره عمرها ما كانت بقلع الهدوم والله طب اقولك حاجه الكلام الوحش الي بيقولو والصور العريانه الي مع رجاله واحنا عارفين انك مش انتي يا ستي الي عملتي كده ربنا يكفينا رمي المحصنات وغير المحصنات الي خلاهم يطلعوا اشعات وحشه عليكي من الي بتقديمه والله لو عاوزه تكوني مشهوره يا ستي اعملي الي انتي عوزاه بس احترمي الناس ونفسك لأنها غاليه ربنا شيفك هتقابليه ازاي هتقولي كنتي بتكسبي ازاي باللبس الخليع ده نفسي اعرف ايه الثقافه المتخلفه عند ناس كتير ان الشياكة في اني اعري جسمي واكشف كل غالي ليه ده حاجه ربنا كرمنا بيها
• انا اجاوبك ليه كده ..!!?? لما تكوني أنسانه أنسانه زي البنات المحترمات الي بيخافوا ربهم وبيحترمو اهليهم ومجتمعهم أقسملك بالله ما في حد حيعبرك .. لكن مدام تتمسخري وتتراصي حيهجموكِ بالالفاظ وبال……….. انتي بنت صغيره راجعي نفسك وتوبي ابواب التوبه مفتوحه ارجوكي ارجوكي والله العظيم الفلوس مش كل حاجه والله والله طيب اذكرك بشي وخلاص احنا العرب المسلمين شو هو دعائنا دائماً .. تعرفي شو ( اللهم ربي الستر والعافيه )
• عشان انتي مش تمام با الفيديو اللي مصر كلها اتفرجت عليه
• بيشتموكى لأنك قالعه علطووول اتقى الله علشان ربنا هيحاسبك
• انتي لو عايزانه نحترمك بلاش الي انتي بتعمليه ده .. علي فكره انتي جميله .. وخلقتك حلوه .. بس حرام تضيعي الجمال ده في الارف ده بجد حرام عليكي .. انتي ازاي بتصلي ... انتي لو بتصلي فعلا وعارفه ربنا مكنتيش هتعملي الارف ده .. لو الكلام يدايق انا بعتذر بس ده الصراحه ولو حد موافق كلامي حطو لايك 

كانت تلك بعض مقتطفات من تعليقات الناس عالنت والسوشيال ميديا (شبكات التواصل الإجتماعي) قبل وبعد الحكم على مودة . أوردناها بدون أى تعديل حتى بأخطائها الإملائية وإمتنعنا عن نشر بعض منها لصعوبتها علينا فعلا .. الشىء اللافت هنا هو عدد المتابعين وإخلاصهم فى المتابعة لهذه الحسابات .. المشكلة فى مين فى اللى نشر الفضيحة ؟ ولا اللى عملها أصلا ؟ ولا اللى شجعها وتابعها وشيرها ؟ ولا فينا كلنا كمجتمع ؟

أما بالنسبة لموضوع قيم الأسرة المصرية .. دا محتاج وقت إضافى وموضوع يطول شرحه .. لكن تقدر تتابعه فى الوسوم أسفل هذا المقال .

إقرأ تحديث الموضوع : براءة مودة وحنين